La Xunta pola Defensa de la Llingua Asturiana (XDLA) entrega esti vienres, a les 19.30 hores, nel Salón d’Actos del Antiguu Institutu de Xixón, los Premios Andrés Solar na so XXVII edición. Nesta ocasión, el Pegollu foi pa L.lumés, primer vinu de Cangas etiquetao n'asturianu y el Madreñazu foi pa César Movilla Anta, alcalde de Noreña. Pa poner el ramu a la entrega va contase cola actuación musical de dos artiestes del occidente asturianu: Pedru y Tania Pereira.

Los Premios Andrés Solar tienen una vertiente doble: per un llau, la Xunta premia a una entidá o persona que rescamplara nel últimu añu pol so llabor en defensa o promoción del asturianu. Esti reconocimientu materialízase nel Pegollu, que nesta ocasión quier reconocer el trabayu de la familia Marcos al frente de les Bodegues Oubanca y, en palabres de la XDLA, «el so apueste pioneru pola visibilización y normalización del asturianu nun sector productivu y comercial emblemáticu». 

El Madreñazu, la versión negativa del premiu, que quier poner n'evidencia la persona o entidá que rescamplara pol so llabor contra la llingua asturiana, va anguaño pal alcalde de Noreña, César Movilla. Merezlo, según esplica la XDLA, «como responsable máximu del Conceyu y pola so actitú repetida de rechazu al usu de la llingua asturiana nel ámbitu de la so competencia, vulnerando d’esta manera tanto los derechos de la ciudadanía xeneral como la de los sos llexítimos representantes democráticos».